- Мәдениет & Спорт
- 26 Қаңтар, 2023
Карикатура тарланы
Қазақстан Республикасының Мемлекеттік Орталық музейінде елімізге танымал карикатурашы-суретші, мәдениет қайраткері, Суретшілер, Журналистер, Жазушылар одақтарының мүшесі Еркін Нұразханның «Карикатура тарланы» атты жеке көрмесі ашылды.
Ол қазақ бейнелеу өнерінде карикатура, шарж (достық әзілді портрет) жанрының қалыптасып, дамуына өзіндік үлесін қосқан, бүгінде осы бағыттың көшбасшысы саналатын танымал суретші.Суретші-карикатурашы 1982 жылдан бастап әдебиет, өнер және қоғам қайраткерлерінің әзіл портреттер галереясын жасап келеді. Ол еліміз тәуелсіздік алған жылдар ішіндегі әлеуметтік-экономикалық, саяси өміріміздегі келеңсіз құбылыстарды сынға алған сатиралық суреттер топтамасын дүниеге әкелді. Сондай-ақ, оқырмандарға өзекті мәселелерді көтерген мақалалары және деректі дүниелерімен танылған қаламгер. Суретшінің тақырыптары әр алуан, бейнелеген кейіпкерлері сан қырлы мінез-құлықты болса, сурет салудағы техникасы тым қарапайым. Негізінен қағаз, қаламұш, тушь, акварель бояуы, гельді қалам, түсті қарындаштарды қолданады.
Карикатурашыны шығармашылыққа жетелеген – өмірдің өзі. Ол қоғам мен адам, саясат пен заман кеңістігінде қайшыласқан мүдделер майданы мен керағар көзқарастарды жіті бақылап, ақ-қарасын анықтап, ішке жиған-түйгенін ел назарына ұсынды. Көрерменін бей-жай қалдырмай, қоғам мен заманның кілтипанын табуға үндеп, сол процестерге қатысуға, ой түюге, әркімді өз ұстанымын анықтап алуға шақырады. Осыдан келе суретшінің азаматтық позициясы анықтала түседі. Ол әділдік пен адалдық, шындық пен ақиқат жағында болып, халықтың мұң-мұқтажын жеткізіп, өмірдегі өзгерістерге солардың тұрғысынан қарап, бағасын бере алса — нағыз халықшыл суретші, өз елінің патриоты болғаны. «Карикатура тарланы» көрмесі соның дәлелі.
Көрмеге келушілер суретші-карикатурашының шыншыл да айқын сырларға толы дүниетанымымен табысады.
АЙЖАН ЖАСБАТЫРҚЫЗЫ
343 рет
көрсетілді0
пікір