- Аймақ тынысы
- 26 Қаңтар, 2023
Өсімге серпін берер жобалар
Үкімет алдында қазіргі уақыттың талап-сынақтарына жауап беретін жаңа мақсат-міндеттер тұр. Бұл ретте еліміздегі аса маңызды жобаларды жүзеге асыратын негізгі мемлекеттік органның бірі ретінде Индустрия министрлігіне зор жауапкершілік жүктелген. Министрліктің алқа мәжілісінде премьер-министр Әлихан Смайылов сала алдындағы басым бағыттарға тоқталды.
Өткен жылдың қорытындысы бойынша өнеркәсіп саласындағы өсім 1,1%-ға жетті. Өңдеу өнеркәсібіндегі өндіріс көлемі 3,4%-ға ұлғайды. Іс жүзінде барлық секторда оң серпін байқалып отыр. 2022 жылы өңдеу өнеркәсібін дамытып, жолға қою үшін министрлік жүйелі жұмыстар атқарды.
Ведомство басшысы Марат Қарабаевтың айтуынша, өнеркәсіп саласында барлық қажетті нормативтік база қабылданды. Арнайы экономикалық аймақтардың қызметін жетілдіру мақсатында заңнамалық түзетулер қарастырылды. Елішілік құндылықтар мен экспортқа бағытталған өндірістерді дамыту бағдарламасы бекітілді. 4%-дық жеңілдетілген автонесиелеу мен 6%-дық ауыл шаруашылығы техникасына арналған бағдарламалар іске қосылды.
Былтыр отандық өңдеушілердің шикізат тапшылығы мәселесін шешуге байланысты жұмыстар жалғастырылды. Жыл қорытындысы бойынша ішкі нарыққа алюминийді жеткізуге қатысты 7 келісімге қол қойылды. Соған сәйкес аталған шикізатты өңдеуден бастап, алюминий профильдерін, кабельдерді және тағы басқа дайын өнімдерді шығару көзделген.
Жеңіл өнеркәсіп пен құрылыс индустриясының тауарларына мемлекеттік сатып алу процесі жүзеге асырылған жағдайда ұлттық режімнен алып тастау тетігі белгіленді. Еліміздегі болат өнімдерін шығаратын кәсіпорындардың жүктемесін арттыру үшін металл сынықтары мен қалдықтарын республика аумағынан әкетуге шектеу қойылды.
Отандық полимерлі өнімдердің өндірушілерін қолжетімді шикізатпен қамтамасыз ету үшін, сондай-ақ ішкі нарықтағы дайын өнімнің құнын төмендету мақсатында ПЭТ-қалдықтарын экспорттауға уақытша тыйым салынды.
Сонымен қатар жылыту маусымында халық пен коммуналдық-тұрмыстық сектор тарапынан көмірге сұраныс артатындықтан, тапшылықтың алдын алу мен шекаралас өңірлерден көршілес елдерге қайта сатуды болдырмау үшін көмірді автокөлікпен әкетуге тыйым салынды. Бұл шұғыл шаралар шикізат тапшылығы мәселесін шешіп, ішкі нарықты тұрақтандыруға, отандық тауар өндірушілердің жүктемесін арттырып, еліміздегі шикізатты өңдеу мен импортты алмастыру деңгейін ұлғайтуға жол ашты.
2022 жылдың қорытындысы бойынша 2 трлн теңге сомасына 14,4 мың жұмыс орнын ашуға мүмкіндік туғызған 160 жоба іске асырылды. Айталық, Қызылорда облысында табақ шыны өндірісі, Атырау облысында полипропилен шығаратын, Қарағанды облысында автомобиль шиналарын өндіретін, сондай-ақ Шымкент қаласында алюминий қалбырын шығаратын кәсіпорынның жұмысы жолға қойылды. Жамбыл облысында азот-фосфор тыңайтқыштарын өндіру 2 есе ұлғайтылды.
Ағымдағы жылы өнеркәсіпті дамытуға байланысты қолданыстағы заңнаманы жетілдіру жұмысы жалғастырылады.
«Мемлекет басшысының тапсырмасына сәйкес орта және жоғары бөліністегі өнімдерді өндіру мақсатында ішкі нарықты елімізде шығарылатын базалық материалдармен қамтамасыз ету жөніндегі шаралар қабылданады. Бұған қоса, импортты алмастырудың салалық жоспарлары мен өңірлік бағдарламалары қолға алынады», – деді Марат Қарабаев.
Оның айтуынша, жыл соңына дейін 16,3 мың тұрақты жұмыс орнын ашуды қарастыратын 1,1 трлн теңге сомасына 149 жобаны іске асыру көзделген. 2022 жылдың қорытындысы бойынша көлік саласында нақты көлем индексі 103,9%-ға жетті.
Премьер-министр өз сөзінде осы жылы Индустрия және инфрақұрылымдық даму министрлігінің алдында қазіргі сын-қатерлерге төтеп беретін бірқатар маңызды міндеттер тұрғанын атап өтті. Бұл ретте тау-кен өндіру саласын дамытуға серпін беріп, өңдеу өнеркәсібінде жаңа өндірістер құру жөніндегі жұмысты күшейту қажет.
«Экономиканы әртараптандыру қарқынын төмендетуге болмайды. Алдымызда ЖІӨ-нің шамамен 4-5% деңгейінде жыл сайын тұрақты өсуін қамтамасыз ету міндеті тұр. Осыған байланысты Индустрия және инфрақұрылымдық даму министрлігі өңірлер әкімдіктерімен бірлесіп, индустриялық жобалар пулын кеңейтуі қажет. Әсіресе, импортты алмастыруға баса назар аударылуы тиіс», – деді Әлихан Смайылов.
Бұл орайда ол моноқалалардың дамуын ескеру маңызды екенін, жаңа кәсіпорындар халықты қосымша жұмыспен қамтамасыз ететінін айтты.
Үкімет басшысы қазақстандықтардың автожолдардың сапасына, оның ішінде жүргізіліп жатқан жөндеу жұмыстарына қатысты шағымдары бар екенін де айтып өтті. Бұл мәселеде тиімді жоспарлау, келісімшарттарды енгізу, техникалық қадағалауды күшейту, цифрландыру аса маңызды.
Премьер-министр Қазақстанның көлік жүйесін халықаралық дәліздермен одан әрі интеграциялау бойынша жұмыстың маңыздылығын атады. Бұл елімізге аймақтағы негізгі транзиттік хабтардың біріне айналуға, сондай-ақ Ақтау және Құрық порттарын дамытуға, «Ақтау теңіз порты» АЭА базасында логистикалық хаб құруға, ҚТЖ трансформациялауға, теміржолдар салуға және жылжымалы құрамды жаңартуға мүмкіндік береді.
Тұрғын үй құрылысында және инженерлік инфрақұрылымды жаңғыртуда барлық жоспарланған көрсеткіштерге қол жеткізу қажет.
Премьер-министр «Kaznedra» ақпараттық платформасын өнеркәсіптік пайдалануға беруді жеделдетуді, Minerals.gov.kz жер қойнауын пайдаланушылардың бірыңғай платформасындағы функцияларды автоматтандыруды, арнайы экономикалық аймақтардың тиімділігін арттыру бойынша олардың жұмысының жаңа моделін енгізу арқылы жан-жақты шаралар қабылдауды, шикізатпен қамтамасыз ету және дайын өнімді өткізу үшін отандық кәсіпорындарға қолдау көрсетуді тапсырды.
БОТАГӨЗ ӘБДІРЕЙҚЫЗЫ
354 рет
көрсетілді0
пікір