• Руханият
• 02 Ақпан, 2023

Мүмкіндік шектеліп қалмайды

Алматы қаласының іскер әйелдер қауымдастығы «MamaPro» қоғамдық қорымен және «ICF-Kazakhstan» қоғамдық бірлестігімен бірге ерекше баласы бар аналарға арналған «Әйелдер әйелдерге» атты әлеуметтік жобасын бастады. Алматы қаласында 22 азаматша менторлар мен коучтардың көмегі арқылы жеке кәсібін бастауға және жұмысқа тұруға мүмкіндік алды.

Жоба бірнеше кезеңнен тұрады: 2022 желтоқсаны – қатысушылар іріктелді. Белсенді кез – 2023 жылғы қаңтар мен сәуір аралығы, бұл айларда әйелдер­ге менторлық жетекшілік пен коучингті кәсіп иелерінің өздері жүргізеді. Жобаға қатысушылар кәсіпкерлік қызметтің негіздерін оқып, психологиялық қолдау­дан өткенін атап өткен жөн. Мұнымен қатар ерекше баласы бар аналарға жеке кәсібін ашуға арналған шеберлік сабақтар мен заң тұрғысынан кеңес алу ұйымдастырылады. «Жоба екі бағдарламадан тұрады. Бас­таманы қолға алушылар үш ананы жұмысқа тұрғызуды өз мойнына алады және қалған он тоғызы оқудан кейін өз бизнесін бастауға дайын болады деп үміттенеміз. Қоғамдағы әлеуметтік мәселелерді тек жұ­мыла отырып шешуге болады. Инклюзия мәселесіне кел­ген­де елімізде әлі дамытатын, атқаратын іс көп. Егер ерекше балалардың аналары кәсіп ашып, аяғына нық тұрса, онда біз осы жеткіншектер өсіп жат­қан отбасындағы әлеуметтік салмақты жеңілдетеміз. «Әйел­дер әйелдерге» жобасының мақсаты да осы», – деп атап өтті Алматы қаласы Іскер әйелдер қауымдастығының төрайымы Наталья Мұхамеджанова.

САЛТАНАТ ҚАЖЫКЕН