- Аймақ
- 05 Наурыз, 2020
Агрохимияның айшықты рөлі
Жер тыңайса – өнім молаяды
Жоғары деңгейлі астық дақылдарын алумен ауыл шаруашылығы өндірісін дамытудың бірден-бір кепілі – топырақта қажетті көлемде қоректік заттардың болуы. Бұл ретте агрохимия саласының көмегімен топырақ құнарлылығын арттыру, агрохимия өнімдерін ішкі тұтынуды ұлғайту жалпы ауыл шаруашылығының өнімділігі мен кірістілігіне әсер етеді.
Жерді тыңайту мен өсімдіктерді түрлі аурулардан қорғау өнім көлемінің ұлғаюына әкелетіні, жем құрамын жақсарту ет, сүт және басқа да ауылшаруашылық өнімдерінің сапасын жоғарылататыны адамзатқа ертеден аян. Ал бүгінде үдемелі жылдамдықпен өзгеріп жатқан заман жерді пайдаланудың, өсімдік және мал шаруашылығын өркендетудің дәстүрлі тәсілдерін өзгертуге мәжбүрлеуде. Осы орайда әлемдегі ең ірі фосфоритті бассейндердің біріне ие еліміздің химия индустриясының орталығы – Жамбыл облысында Азия агрохимиялық форумы бесінші жыл қатарынан өткізіліп отыр. Мұндай іс-шара агроөнеркәсіптік және агрохимиялық бизнесті жүргізудің алдыңғы қатарлы әдістерін, тыңайтқыштарды қолданудың заманауи жүйелерін және агрономиялық ғылымды дамыту мен таратудың маңызды мәселелерін талқылауға мүмкіндік беретіні сөзсіз. Азиядағы агрохимия саласының мамандарына арналған алаң құру, алдыңғы қатарлы әдістерді насихаттау, пікірталас, іскерлік келіссөздер жасау мен көшбасшылық байланыс орнату – Орталық Азияда агрохимия нарығын дамытудың құрамдас бөлігі болады.
Өз елімізбен бірге, Ресей, Украина, Беларусь, Өзбекстан, Қырғызстан, Тәжікстан, Ауғанстан және Литваның ауылшаруашылық құрылымдары мен минералды тыңайтқыштардың зауыт-өндірушілері, барлығы 500-ден аса делегат қатысқан ауқымды шараға минералды тыңайтқыштардың ірі өндірушілері – «Қазфосфат», «ЕвроХим», «ҚазАзот» компаниялары және «Маркер Групп» ақпараттық-талдау компаниясы бастамашы болды. Форумға облыс әкімі Бердібек Сапарбаев қатысып, сөз сөйледі. – Химия өнеркәсібі үшін пайдалы қазбалар қорының 75 пайызы Жамбыл облысында шоғырланған, өнеркәсіп өнімдері экспортының 30 пайызы «Қазфосфат» ЖШС зауыттарына тиесілі. Агрохимия заманауи ауыл шаруашылығын дамытуда шешуші рөл атқарады. Сәйкесінше, бұл форум еліміздің агроөнеркәсіптік кешенін дамытуға серпін береді деп сенемін, – деді Б.Сапарбаев делегаттарға. Кез-келген елдің, әсіресе, ауыл шаруашылығы бағытындағы елдің экономикасы үшін минералды тыңайтқыштардың маңыздылығы баршаға белгілі. Осы есептен аграрлық сектордағы еңбек өнімділігін арттыруды, өндірісті ұлғайтуды мақсат етіп отырған еліміз үшін минералды тыңайтқыштарды тұтынуға көп көңіл бөлінетіні түсінікті. – Жамбыл облысы бүкіл Қазақстанды минералды тыңайтқыштармен қамтамасыз ете алады. Бұл үшін бізде мүмкіндіктер жеткілікті. Біз аймақта дақылдардың шығымдылығын арттыру үшін минералды тыңайтқыштар өндіру қарқынын үнемі арттырып отырған «Қазфосфат» компаниясын жан-жақты қолдаймыз. Сонымен қатар «ЕвроХим» АҚ-пен бірлесіп құны шамамен бір миллиард доллар болатын ірі жоба жүзеге асырылуда, – деп атап өтті облыс әкімі. Ал ауыл шаруашылығы басқармасының басшысы Берік Нығмашев минералды тыңайтқыштардың қолданылуын арттыру үшін арнайы карта қабылданғанын мәлім етті. Өткен жылы топырақта тыңайтқыштарды қолдану деңгейі 22 пайызды құрап, бұл елдегі ең жақсы көрсеткіштердің бірі болды. Өткен жылы осы мақсатқа 900 миллион теңге, биыл 1 миллиард теңге бөлінген және бұл көрсеткішті 25 пайызға жеткізу көзделіп отір. Аймақтағы шаруа қожалығының басшысы Хамитулла Байназаров қант қызылшасы мен тұқымын өсіру үшін минералды тыңайтқыштар сатып алуға субсидия көлемін көбейту, сондай-ақ оны күз кезінде емес, көктемгі егіс алдында бергізу мәселесін көтерді. Агроөнеркәсіптік кешені іскерлік кеңесінің басшысы Арман Евниев негізгі мақсаты – алдағы онжылдықта ауыл шаруашылығы өнімділігін ең жақсы көрсеткіштері бар 30 елдің деңгейіне жеткізу болып табылатын «Агроиндустриялық Қазақстан-2030» стратегиялық бастамасы жөнінде егжей-тегжейлі айтып берді. Облыс басшысы өңірлік кластер құру идеясын қолдайтынын жеткізді. Б.Сапарбаев кооперативтер құру мәселесіне ерекше тоқталып, қазіргі таңда Жамбыл облысында әрқайсысы 5-10 гектардан тұратын 18 мыңнан астам шаруа қожалықтары бар болса, олардың айналым капиталы, жабдықтар, жоғары сапалы тұқымдар мен тыңайтқыштар сатып алу мүмкіндігі жоқтығын, енді бұл бағытта қарқынды жұмыс жүргізілетінін айтты. Агрофорумда фермерлер үшін өсімдік шаруашылығындағы субсидиялаудың кейбір тәсілдері, орнықты ауыл шаруашылығын дамыту бағдарламасы, фосфогипс тиімділігі, еліміздегі агрохимиялық индустрияның бүгінгі жағдайы, минералды тыңайтқыштар сервисі, жарма және өнеркәсіптік дақылдар өсіруге инновациялық технологияларды қолдану, сондай-ақ экономикалық тиімділікті ескере отырып, дақылдарды таңдау жөніндегі өзекті тақырыптар қозғалды. – Әлі күнге дейін топыраққа қажетті тыңайтқыш мөлшерін қолданған кезде Кеңес одағы кезінен қалған артықшылықтарды пайдалануға тырысамыз. Қазақстанда топырақ құнарлылығының сарқылу проблемасы бұрыннан өзекті. Елде бос қалған жерлер бар. Сондықтан ғалымдар да, өндірушілер де өз тәжірибелері мен білімдерін фермерлермен бөлісуге дайын. Егер біз анағұрлым тиімді жұмыс істегіміз келсе, онда бұл жерлерге минералды тыңайтқыштар мен қорғаныс құралдарын енгізуіміз керек. Жерге тигізген пайдамыздың бәрі ауыл шаруашылығының дамуына ықпал етеді. Осы іске жергілікті шаруа қожалықтарының белсенді қатысқаны жөн-ақ, – деді «Казфосфат» компаниясының басшысы Мұқаш Ескендіров. Бүгінде қазақстандық аграршылар егін егу үшін орта есеппен 5 кг тыңайтқышты пайдаланады. Көрші Қырғызстанда бұл 20 кг шамасында, яғни, олардан төрт есе артта келеміз. Жерді тыңайтпай, жоғары нәтижеге жету мүмкін емес. «Қазфосфат» басшысы осыған назар аударды. Форум аясында қатысушылар «Қазфосфат» ЖШС минералды тыңайтқыштар зауытына барып, ондағы жаңғырту жұмыстарымен, минералды тыңайтқыштар өндірісімен танысты.
БОТАГӨЗ ӘБДІРЕЙҚЫЗЫ
684 рет
көрсетілді0
пікір