- Аймақ
- 14 Мамыр, 2020
Құрылысқа мемлекет көңіл бөледі
Құрылыс секторы инвестициялық қолдаудан кенже қалды: жүйедегі күрделі қаржы жұмсалымы «карантиндік» бірінші тоқсанда екі еседен астам салымға тұралаған. COVID-19 індетіне байланысты құрылыстағы іркіліске жол бермеу үшін мемлекет тиісті шаралар қабылдап отыр, деп жазады www.finprom.kz сайты.
2020 жылдың қаңтар-наурызында ҚР-дағы құрылыс саласына капиталдық инвестиция бар-жоғы 11,82 млрд тг құраған, сөйтіп, былтырғы жылдың бірінші тоқсанымен салыстырғанда – 51,7%-ға (ИФО – 46,7%) кем шыққан. Қазақстан бойынша меншікті капиталға инвестициялардың барлық көлемінің тек 0,51%-ы ғана осы сектордағы күрделі қаржы жұмсалымын қамтып отыр. Күрделі қаржы жұмсалымының 94,3%-ы құрылысты салушылардың жеке қаржылары есебінен, 1,6%-ы – банктік кредиттер есебінен, 4,1%-ы – басқа да қарыз қаражаттар есебінен қамтамасыз етілген. Аймақтар арасында сектордағы күрделі қаржы жұмсалымдары бойынша Атырау (3,3 млрд тг, жыл бойынша минус 65,7%) және Алматы (2,1 млрд тг, минус 52,6%) облыстары көш бастап отыр. Үздік үштікті Алматы қаласы қорытындылайды: 1,3 млрд тг, жылға шаққанда минус 18,5%. Құрылыс секторына салымдар өсімі 17 аймақтың 5-еуінде ғана байқалады. Соған қарамастан құрылыс секторындағы жұмыстар көлемі үш айда 456,1 млрд теңгеге жеткен – 2019 жылдың қаңтар–наурызымен салыстырғанда 13%-ға (403,7 млрд тг) артық (1-инфографика).
ҚР Индустрия және инфрақұрылымдық даму министрлігі Құрылыс және тұрғын үй-коммуналдық шаруашылық істері комитеті «Нұрлы жер» Мемлекеттік бағдарламасы аясында елімізде құрылыс саласын қолдауға арналған бірқатар шаралар қарастырылғанын хабарлайды. Мәселен, әкімдіктер мұқтаж азаматтар үшін жеке құрылыс салушылардан дайын тұрғын үй сатып алуға мүмкіндіктері бар. Осы мақсатта ағымдағы жылы 4 мыңнан аса пәтер алуға 35 млрд тг қарастырылған. Республикалық бюджеттен қаражат белгіленген шектеулер бойынша (1 шаршы метріне 140–180 мың теңге) бөлінетін болады. Сонымен қатар әкімдіктер тұрғын үйлерді сатып алғанда шығындарды жергілікті бюджеттен бірлесіп қаржыландыра алады. Сондай-ақ ҚР-да қаржыландырудың барлық көздерінен жаңа 14 млн шаршы метрден астам тұрғын үй құрылысы жоспарланған. Әкімдіктер мемлекеттік инвестициялар есебінен 269 млрд теңгеге әлеуметтік тұрғын үй және тұрғын жайлар құрылысы аудандарына инфрақұрылым тарту бойынша 730 жобаларды іске асыруды жоспарлаған. Құрылыстың ағымдағы көлемдерін қолдау үшін Ұлттық банк «Бәйтерек» ҰБХ» АҚ-на, кезекте тұрғандар үшін әлеуметтік кредиттік тұрғын үйлер құрылысын қаржыландыру мақсатында, жергілікті атқарушы органдардың облигацияларын сатып алуға жылдық есепте 4%-бен 180 млрд теңге қосымша қаражат бөлді (2-инфографика).
Исатай ҚАМБАРОВ
462 рет
көрсетілді0
пікір