- Аймақ
- 06 Тамыз, 2020
Әлеуметтік жауапкершілік алдыға шықты
Жалпақ әлемге таралған коронавирус індеті шекаралардың жабылып, елдер арасындағы барыс-келіс пен сауда-саттықтың шектелуіне әкелді. Осыған байланысты туындаған жағдай қай салада болмасын шығын көздерін барынша қысқартып, межелі міндеттер мен жоспарлы жұмыстарға өзгерістер енгізуге мәжбүр етті. Десек те, жаһандық деңгейдегі қиындықтарға төтеп беріп, еліміз экономикасының қалыпты дамуына өзіндік үлес қосып келе жатқан локомотив-салалардың ірі кәсіпорындары бүгінгі күні де әлеуметтік жауапкершілікті алдыға қойып, індетпен күрес барысында көпшілікке көмек қолын созуда.
Осы орайда таяуда Атырау облысында жұмыс сапарымен болған «ҚазМұнайГаз» ҰК АҚ басқарма төрағасы Алик Айдарбаевтың өңір басшысы Махамбет Досмұхамбетовпен кездесуі барысында аймақтағы ұлттық компания кәсіпорындарының эпидемиологиялық ахуалы, сондай-ақ коронавирус індетімен күрес аясында көрсетіліп жатқан демеушілік көмек мәселелері талқыланды. Әңгіме барысында «ҚазМұнайГаз» ҰК АҚ (ҚМГ) басқарма төрағасы компанияның Атырау өңірінде жұмыс істейтін еншілес кәсіпорындары облыс әкімдігімен өзара ынтымақтаса отырып, халыққа және медициналық мекемелерге көмек көрсету үшін қомақты қаражат бөліп отырғанын айтты. «Мысалы, «Ембімұнайгаз» кәсіпорны 300 миллион теңге бөлді. Бұл қаражатқа медициналық құрал-жабдық пен дәрі-дәрмек, сонымен қатар карантиндік станционарларға азық-түлік, тұрмыстық техника, гигиеналық заттар және жеке қорғаныс құралдары сатып алынды. Қазіргідей қиын шақта жан-жақты көмек көрсету – әркімнің борышы деп білеміз», – деді ҚМГ басшысы А.Айдарбаев.
Сондай-ақ ҚМГ басшысы өңірдегі еншілес компаниялар басшыларының қатысуымен селекторлық жиналыс өткізді. Өндірістік басқосуда ағымдағы жұмыстың, дағдарысқа қарсы стратегияның іске асырылу барысы, коронавируспен күрес және санитарлық-эпидемиологияық шаралардың қатаң орындалуы жөніндегі мәселелер талқыланды. Алик Айдарбаев коронавирус инфекциясы мен пневмониядан қайтыс болған қызметкерлердің отбасылары мен туған-туыстарына көңіл айтып, індетке шалдыққан әріптестеріне тезірек сауығып кетуін тіледі. Сапар барысында ҚМГ басқарма төрағасы Атырау мұнай өңдеу зауытында болып, жоспарлы жөндеу жұмыстарының барысымен танысты және кәсіпорын жанынан мемлекеттік-жекешелік әріптестік қағидаты бойынша құрылған жаңа медициналық орталықты аралап, көрді. Заманауи медициналық жабдықпен жабдықталған медициналық орталықта зауыт қызметкерлері кәсіпорын аумағынан шықпай-ақ білікті медициналық көмек ала алады. Орталықта оқшаулау аумағы бар екенін ерекше атап өткен жөн. Медициналық тексеру барысында Covid-19 белгілері анықталған қызметкерлер бірден осы жерге жіберілетін болады. А.Айдарбаев зауыт басшылығының назарын Атырау қаласы тұрғындарының шағымдарына аударды. «Тұрғындар қаланың сол жағалауында «Сасық сай» деп аталып кеткен, булану алқаптарынан шығатын жағымсыз иіске қатысты наразылықтарын талай білдірген болатын. Бұл мәселеден хабардармыз. Бірақ ашығын айтатын болсақ, «Сасық сайға» ағынды су екі жерден келеді, бірі – қаладан, екіншісі – Атырау мұнай өңдеу зауытынан. Лас судың басым бөлігі ондаған жылдар бойы қалалық кәріз ағындыларынан келуде, ол ешқандай тазартудан өтпейді. Ал зауытта барлық қажетті нормалар мен талаптарға сай механикалық және биологиялық тазарту құрылғыларының орнатылғанына біраз уақыт болды. Оның үстіне, олар үнемі жаңартылып отырады. Әрине, біз әлеуметтік жауапты компания ретінде осы алқапты қалпына келтіру жұмыстарына қатысамыз, өңір халқына, табиғаты мен қоршаған ортаға барынша қамқорлық көрсетеміз. Дегенмен, тұрғындар бүгінгі мәселенің түп-тамыры неде екенін түсінуге тиіс. Сондықтан аймақтағы қоғам белсенділерімен тығыз қарым-қатынас орнатып, зауыттың атқарып жатқан жұмысын тұрақты түрде түсіндіру қажет», – деп тапсырды ҚМГ басшысы. Өз кезегінде «Tazalyq» жобасын іске асыру барысы туралы баяндаған «Атырау мұнай өңдеу зауыты» ЖШС бас директоры Ш.Данбай қазіргі уақытта механикалық тазарту құрылымдарын қайта құру жөніндегі жобалау-іздестіру жұмыстары 90 пайызға орындалғанын, ал биологиялық тазарту құрылымдарын жаңғырту бойынша инженерлік ізденістер жүргізіліп жатқанын атап өтті. Булану алқаптарын қалпына келтіру жобасының жобалау-іздестіру жұмыстары 60 пайызға атқарылған. Сонымен қатар өңірге жұмыс сапары кезінде «ҚазМұнайГаз» ҰК АҚ басқарма төрағасы А.Айдарбаев KPI – Интеграцияланған газ-химия кешенінің құрылыс алаңында болып, жұмыс барысымен танысты. Интеграцияланған газ-химия кешенінің жобасы ұлттық компанияның басқаруына 2018 жылдың маусым айында берілген болатын. Қазіргі күні кешен жобасының құрылысы 73,5 пайызға орындалды. Құрылыс нысанында бетондық жұмыстар, жерасты және жерүсті құбырларын, металл құрылымдарын, сэндвич-панельдерді, су сақтауға арналған резервуарларды монтаждау және т.б. жұмыстар жүргізілуде. Кешен жобасындағы түрлі нысандар құрылысының дайындығы 51 пайыздан 97 пайызды құрайды. Осы тұрғыдан алғанда құбыр тораптарын дайындау және технологиялық құбырларды монтаждау жұмыстарының іске асырылу көрсеткіші ең төменгі деңгейде. Бұл елде енгізілген карантин тәртібімен байланысты. Өйткені осы кезеңде жұмысшылардың бір бөлігі қашықтан жұмыс істеу әдісіне көшірілді. Сонымен қатар әуе тасымалының тыйым салынуына байланысты аса күрделі жұмыстарды және арнайы құрал-жабдықтарды монтаждаумен айналысатын шетелдік мамандар елімізге келе алмады. ҚМГ басқаруына берілгеннен бергі кезеңде интеграцияланған газ-химия кешені жобасының құрылыс жұмыстары қарқынды жүргізілуде. Кешеннің жылдық өндірістік қуаты 500 мың тоннаға дейін полипропилен шығаруға мүмкіндік береді.
БЕКЕТ КӨКЕНАЙҰЛЫ
32455 рет
көрсетілді0
пікір