- Серпін
- 19 Мамыр, 2021
22 мың адамға жұмыс табылмақ
Қытай инвесторлары Түркістан облысында автобустар мен электр аккумуляторын жасап шығаратын зауыт салмақ. Бұл жөнінде Түркістан облысының әкімі Өмірзақ Шөкеевтің Қытай Халық Республикасының кәсіпкерлерін қолдау қауымдастығының президенті Хуан Линьмен кездесуі барысында талқыланды. Басқосу нәтижесінде ынтымақтастық туралы меморандумға қол қойылды.
Нұрлан ҚҰМАР
Қауымдастық президенті сауда-экономикалық ынтымақтастықты одан әрі нығайтуға мүдделі екенін атап өтіп, Түркістан облысында өз бизнесін дамытқысы келетін қытайлық кәсіпкерлердің саны артқанын жеткізді.
«Түркістан облысы өте қарқынды даму үстінде. Қытайдың көптеген инвесторлары осы Түркістан облысына келіп, жұмыс істеуді армандайды. Біздің қауымдастықта 20 мыңнан астам орта және кіші кәсіпорындар бар. Пандемия жағдайына байланысты инвесторлар келе алмай отыр. Әзірге автобустар мен электр аккумуляторын жасап шығаратын екі зауыт салуды көздеп отырмыз», – деді Қытай Халық Республикасының кәсіпкерлерін қолдау қауымдастығының президенті Хуан Линь.
Кездесу барысында тараптар екіжақты қарым-қатынастарды, іскерлік байланыстар мен ынтымақтастықты дамыту мәселелерін талқылады. Облыс басшысы Хуан Линді өңірдің экономикалық әлеуетімен таныстырып, бірлескен жобаларды жүзеге асыруға шақырды. Облыс әкімі электр қуатымен жүретін автокөліктерге арналған аккумулятор жасап шығаратын зауыттың құрылысына ерекше мән берді.
«Бұл – болашағы бар жоба. Алдағы уақытта сұранысқа ие болары анық. Сондықтан қолдауға дайынбыз. Индустриялды аймақта бір айдың ішінде еркін экономикалық аймақ қалыптастырылады. Инвесторларға барлық жағдай жасалады. Жер бөлінеді. Электр қуаты және газбен қамтамасыз етіліп, темір жол қызметі ұсынылады. Сонымен қатар, салықтан босатылады. Елімізде сұранысқа ие болатын жобаларды қолдауға біз әрқашан дайынбыз», – деді Өмірзақ Шөкеев.
358 рет
көрсетілді0
пікір