- Саясат
- 27 Мамыр, 2021
Өзара сенім мен түсіністікке негізделген қарым-қатынастар
Қазақстан Республикасы тәуелсіздіктің алғашқы күндерінен бастап-ақ әділеттілік қағидасын басты қаруына айналдыра отырып, барлық елдермен өзара сенім негізінде ынтымақтастық құруға бағытталған бейбіт сыртқы саясат жүргізіп келеді. Бүгінгі таңда еліміз әлемнің 180-ге жуық елімен дипломатиялық қарым-қатынастар орнатты. Шет мемлекеттерде Қазақстанның 60-тан астам елшілігі, халықаралық ұйымдар жанында алты тұрақты өкілдігі, сондай-ақ көптеген елдерде әр деңгейдегі консулдық мекемелері жұмыс істейді.
Сонымен қатар Қазақстан Республикасы өзінің егемендігін жарияланғаннан кейін халықаралық қатынастағы аса беделді ұйымдарға, соның ішінде 1992 жылдың 2-наурызда БҰҰ-ның Бас Ассамблеясының 46-сессиясында БҰҰ-ға толық құқықты мүшесі болып қабылданса, аймақтық деңгейде, Қазақстан Тәуелсіз мемлекеттер достастығының (ТМД), Шанхай ынтымақтастық ұйымы (ШЫҰ), Еуразиялық экономикалық одақ (ЕЭО), Ислам ынтымақтастық ұйымы (ИЫҰ), Еуропадағы қауіпсіздік және ынтымақтастық ұйымы (ЕҚЫҰ), Азиядағы өзара іс-қимыл және сенім шаралары кеңесі (АӨСШК), Солтүстік атлантикалық ынтымақтастық кеңесі (NACC) және НАТО-мен «Бейбітшілік үшін серіктестік» бағдарламасының мүшесі болып табылады.
Қазақстан Республикасы әлемдік ынтымақтастықтың дербес субъектісі ретінде әр елмен өзара ықпалдасуын қалыптастыруы үшін тәуелсіздіктің алғашқы сәтінен бастап халықаралық қатынастар саласындағы білікті мамандарды дайындауды қолға алды. Өйткені, Кеңестер Одағының дәуірінде халықаралық қатынастар саласындағы мамандарды Мәскеуде ғана дайындап, сыртқы саясатты тек «орталық» қана айқындайтын еді. Егеменді ел ретінде еліміз халықаралық қатынастар саласындағы мамандарын дайындау үшін 1992 жылдың көктемінде әл-Фараби атындағы Қазақ ұлттық университетінің тарих факультеті шеңберінде халықаралық қатынастар бөлімін ашқан болатын. Тәуелсіз Қазақстанның тұңғыш сыртқы істер министрі Т.Сүлейменов, сол кездегі министр орынбасары, белгілі дипломат, саясаткер, бүгінгі мемлекет басшысы Қ.Тоқаев та жас мамандарды дайындауда аса зор белсенділік танытты. Қасым-Жомарт Тоқаев негізгі кәсіби қызметін атқара жүріп, университеттің алғашқы түлектеріне дипломатиялық және консулдық қызметке қатысты пәндерден дәріс оқыды.
Қазақстанда халықаралық қатынастар саласындағы алғашқы толыққанды мамандар 1995 жылы тұңғыш рет аталмыш университетте ашылған халықаралық қатынастар факультетін бітіріп шыққан болатын. Факультеттің ашылуына белгілі профессор Ж.Ибрашев ұйытқы болды. Халықаралық қатынастар факультетінің тұңғыш деканы болған Г.Жамбатырова да жаңа мамандықты жетілдіру саласында орасан зор еңбек етті. Олар өздерінің адами қасиеттерімен қоса бар білімін жаңа мамандықтың қалыптасуы мен нығаюына арнаған болатын.Тәуелсіздік жылдарында білім алып, кәсіби деңгейлерін жетілдірген факультет түлектері бүгінгі күні еліміздің әлемдік деңгейдегі ынтымақтастығын нығайтуда өз үлестерін қосуда.
Б.З. БӨЖЕЕВА,
Әл-Фараби атындағы
ҚазҰУ-дің халықаралық қатынастар факультетінің доценті
494 рет
көрсетілді0
пікір