- Тарих
- 11 Қараша, 2021
Археологиялық мұра: Ынтымақтастық резолюциясы қабылданды
Биыл Қазақстан археологтары үшін қара шаңырақ болып саналатын Ә.Марғұлан атындағы Археология институтында айрықша оқиға. Еліміздің Тәуелсіздігімен төл құрдас ғылым ордасына – 30 жыл. Мерейтой аясында «Марғұлан оқулары – 2021: Этномәдени зерттеулер контексіндегі Ұлы дала» атты халықаралық ғылыми-тәжірибелік конференция өтті.
Археология саласындағы ғылыми қауымдастық арасында ақпаратпен алмасуды бір жолға қою, халықаралық ынтымақтастықты дамыту еліміздің қазіргі әлемдік ғылыми ортаға интеграциялануы саласында маңызды рөл атқаруда. Қазақстан археология ғылымының бүгінгі жағдайы, мемлекетіміздің археологиялық мұрасын зерттеу, сақтау мен қорғаудың өзекті мәселелері және отандық ғылыми кадрларды даярлау мәселесі сынды көптеген тақырыптар көтерілді. Конференцияға Ресей, Қытай, Қырғызстан, Өзбекстан, Болгария, Түркия, Румыния сияқты жақын және алыс шетелдерден, сондай-ақ Қазақстанның 15 қаласынан жүзден астам ғалым қатысты.
Жиынның ашылуында Ә.Марғұлан атындағы Археология институтының директоры Ақан Оңғарұлы Тәуелсіздіктің 30 жылында отандық археология саласында көптеген жаңалықтар болғанын атап өтті. «Тас дәуірінен бастап кейінгі орта ғасырға дейінгі кезеңді қамтитын еліміздің барлық өңірлерінде бірегей археологиялық жаңалықтар көптеп саналады. Тәуелсіз Қазақстанның символы болып табылатын «Алтын адам», ЮНЕСКО Әлемдік мұра тізіміне Қазақстаннан екінші болып енгізілген жартас суреттерінің бірегей ескерткіші – Таңбалы және атақты Отырар жерінен бастап, Ұлы Жібек жолындағы ортағасырлық қалалар желісін және т.б. тарихтан сыр шертетін орындар табылып, құнды зерттеулер жүргізілді. Шығыс Қазақстан аумағындағы ерте темір дәуіріндегі Берел қорығы, Көне түркі мәдениеті дамуын айғақтайтын бірегей мәдени-мемориалдық кешендер (Меркі, Жайсаң) және басқа көптеген тарихи ескерткіштер әлемдік мәдениетте теңдессіз орын алары хақ. 1991 жылдан бастап Ә.Марғұлан атындағы Археология институты Қазақстанның қазіргі археология ғылымын дамытуда іргелі зерттеулер бағдарламасын әзірлеуге қатысып келеді. Елбасы Н.Ә.Назарбаевтың бастамасымен жүзеге асырылған «Мәдени мұра» ұлттық стратегиялық жобасын орындауға тікелей атсалысуда. 2024 жылы ресми мерекелік іс-шаралар тізбесіне ғалым-археолог, академик Ә.Марғұланның 120 жылдық мерейтойын енгізу қолға алынды», – деп атап өтті ол.
Конференция барысында ғалымдар археологиялық зерттеулерде кездесетін кейбір мәселелерді көтерді. Радиокөміртекті зерттеулердің көмегімен уақытты анықтайтын талдаулар мен трассологиялық сараптамаларды жүргізуде шетел ғалымдарының көмегіне жүгінеміз. Өзімізде мұндай мамандар жетерлік. Институт осындай мамандарды шетелге тәжірибе алмасуға жіберіп, дайындаса игі болар еді. Сондай-ақ, археологтар студент жастар, магистрант, докторанттарды аспан астындағы қазба жұмыстарын қалай жүргізу керектігін үйрететін практикалық сабақтарға мейлінше тартып, жас мамандарды тәрбиелеуіміз қажет деген пікірлерін білдірді. Яғни, білім беру мәселесінде сапалы археолог маманын даярлау үшін методологиялық әдістемелерді бір жүйеге келтіру қажеттігін айтты.
Археолог ғалымдар мен мамандар конференция жұмысының қорытындылары бойынша өздерінің ортаға салған ойлары мен ұсыныстары негізінде бірауыздан өзара ынтымақтаса отырып резолюция қабылдады. Аталмыш құжат қазіргі Қазақстандағы археология ғылымын дамытуға және мәдени мұра ескерткіштері туралы ақпаратты таратуға қолдау көрсету және басқа да игі мақсаттарға бағытталып отыр.
Әлем бойынша Ресей және Қазақстан бірлесе отырып, археологиялық жұмыстарды жүргізуде көш бастап келеді. Еуразия құрлығындағы негізгі екі мемлекеттің бірлескен экспедициялары Ұлы даланың тарихы жайлы тың зерттеулер ашып келеді. Атап айтсақ, Ақтөбе облысы Төлеубұлақ петроглифтеріне ресейлік археологтар А.П.Деревянко, профессор В.Т.Петрин, Ж.К.Таймағамбетов және басқа да ғалымдар бірлесе отырып зерттеу жүргізді.
«Өзімнің ғылыми қызығушылығым Орта Азияның қола дәуірі, радиокөміртекті анықтау, палео-генетикалық зерттеулер жүргізуге арналды, бұл мен үшін үлкен жетістік. Бұл жерде ежелгі қала орындары немесе ежелгі дәуір заманы болсын олардың арасында ешбір дала шекарасы жоқ. Дала өркениетінде мүлдем өзгеше дамыған әлем болды. Сол себепті де екі ел археологтарының ұстанымы, мүддесі де ортақ», – деді Ресей ғылым академиясының материалдық мәдениет тарихы институты директорының міндетін атқарушы, тарих ғылымдарының докторы Андрей Поляков.
НҰРЛАН ҚҰМАР
558 рет
көрсетілді0
пікір